你都可以搵到你的Supper Moment

“阿sir你今晚趕住落堂去邊呀?”

“我要趕住去睇Supper Moment演唱會!”

“嘩咁正!阿sir你就好啦，話時話，你…約左邊個去睇呀?”

“我得一張飛喳，所以自己一個去睇”

“OMG……阿sir好毒呀，自己去睇演唱會……”

“自己去睇先可以專心享受音樂世界，識咩呀你地…………”

好多黎數學補習的學生見教室放左樂器係度，都會問B仔係咪好鐘意音樂，甚至有人會問，其實叫Beyond Math係咪因為B仔好鐘意Beyond樂隊。B仔其實係好鐘意音樂，由The Beatles開始到而家嘅歌B仔都會聽，Beyond都係B仔其中一隊好鐘意嘅樂隊，不過叫Beyond Math就唔開家駒事啦，而係想每個學生都可以超越自己，肯定自己嘅價值。

其實一路都有聽Supper Moment嘅歌，”濕扒”嘅歌主要都係好勵志，講好多關於人生同夢想，過去幾個音樂會都好想去睇，不過大家都知道啦，而家買演唱會飛仲難過 DSE數學攞 5**，所以之前幾次都無緣欣賞Supper Moment演唱會。話說年頭叱咤樂壇頒奬典禮，見到佢地唱<靈感床>時帶領全場氣紛果種震憾，就好想可以係現場睇一次佢地演出。咁岩今年佢地可以進軍紅館開演唱會，又咁岩機緣巧合B仔又得到一張飛，所以今次終於可以去睇啦!

B仔係去睇頭場，因為去之前岩岩先幫黎緊考 DSE數學嘅中六同學仔操DSE MATH PAST PAPER ，所以都未預備好心情。不過去到第一首歌音樂一起，全場已經好high，企晒起身跟住音樂狂跳。由第一首歌直到Encore最後一首<有你有我>(呢首歌好岩中六同學畢業唱)，成場氣氛都好正，Supper Moment成晚同觀眾的互動無停過，之前睇咁多個演唱會都無試過。哈哈不過可能B仔都唔細啦，跳左十分鐘度就要坐低抖抖。

“Supper Moment”其實係”晚餐時刻”的意思，希望大家珍惜同屋企人或朋友的晚餐時刻，好好欣賞同珍惜生命每一件事。每隊樂隊的成功路都係一條唔容易嘅路，佢地四位成員係成名前都有唔同經歷，主音Sunny同Bass手CK試過係青年中心洗廁所，結他手阿雞本身係IT程式員，鼓手阿達屋企人則想佢做生意。由2006年成軍去到2013年<無盡>彈起前的艱辛歲月，甚至之後經理人Gary的過身，從小伙子到大丈夫，中間經歷左一個又一個唔容易行嘅時刻，最後都憑住四位成員的堅持一步一步行過左。到今年可以去紅館開演唱會。由酒吧唱到入紅館，好以佢地自己咁講，真係一個大奇蹟日。Supper Moment每首歌都係自己作曲填詞，係每首歌都會聽得出佢地對音樂理想嘅奮鬥同堅持。

B仔自己覺得Supper Moment成功除左因為對音樂嘅熱誠之外，就係佢地嘅堅持。以前嘅Beyond、太極，到而家嘅Supper Moment、ToNick等等，每隊樂隊都係因為堅持先走上成功之路，或者仲有好多好多樂隊努力過但未必出到名，不過只要你為一件事盡力堅持過嘅話，無論結果係點，你已經值得為自己的堅持努力而驕傲。B仔成日都同要考 DSE數學或其他數學考試嘅同學講，只要盡力堅持努力過，無論最後成績係點，你都唔會後悔，並且可以為自己的堅持而驕傲。

B仔好鐘意<飛>入面其中一段歌詞:

我地生命唔可以重頭來一遍，但我地可以為自己選擇堅持努力的事。

你想堅持的又是甚麼呢?

無論係咩都好，如果你正為某啲目標堅持緊嘅話，請你記住呢個Moment，因為，呢個就係你的Supper Moment。

歡迎同學或家長查詢，如有需要可以預約老師免費面談了解及安排進度。